性教育呢個話題好廣泛，包括認識身體，性別，性取向，性行為等等。
性教育應該由幾時開始好呢？
其實由幼兒認識身體部位嘅時已經開始咗㗎啦，認識性器官同認識其他部位一樣，都有個正確嘅名稱。
除咗教佢哋認識正確嘅名稱外，亦都俾佢哋知道，性器官都係身體嘅一部分，唔需要覺得尷尬或者醜怪。
而最近熱播嘅 「大叔的愛」亦令芊芊講咗句:
我知咩叫Gay，就係男仔扮女仔囉！
其實我哋屋企好少開電視，電視劇更加無追開，但佢有上網，同學有講，所以佢有接觸到呢套電視劇。
我: Gay唔係男扮女，而係佢係男仔，而佢又鐘意男仔，對男仔有種愛嘅感覺囉。
而早幾星期，佢終於都問咗呢個問題:
“Dad, what is sex?”
爸爸靜默咗一陣話: 我諗吓點解釋你知。
我知道我哋需要探討呢個課題，而香港大部分嘅學校，性教育都係較少提及嘅。但而家只要上網，就可以揾到好多正確/唔正確嘅性知識，與其由佢哋亂睇，不如就由家長去開始性教育吧☺️
後來我發現，芊芊係喺一套美劇發現到”sex”呢個字，只係唔知道呢個字係咩嚟，所以我打算用最淺易嘅方法去解釋。
早排同一位心理學家講起，佢分享咗一本幾好用嘅ebook，係一本遊戲書同小朋友認識身體，同埋保護自己。
我都print咗出嚟同兩位進行性教育，有興趣嘅可以喺呢度download:
https://drive.google.com/file/d/1XKFs4a0Y0DFKq0-GMAbdGpF_GRMdd2n6/view?usp=drivesdk
另外瑞典嘅性教育都做得好好，呢個video用兒歌方式去介紹男女分別，雖然聽唔明，但卡通有趣，可以同小朋友一齊睇吓：
https://youtu.be/8Wp9iNINHMc
我自己覺得，性教育唔止停留係認識身體，保護自己嘅層面，應該包括尊重差異，知道呢個世界上有唔同小眾，應該學習包容，互相尊重
