我覺得，我係一個好識教仔女嘅媽咪。
每日都會有好豐富嘅時間表，
每餐都會食有營養嘅食物，
仔女好有禮貌唔會亂發脾氣，
從來唔會瞓地扭買玩具，
做事主動性強唔洗我勞氣。
但其實，呢堆只係我未生小朋友前嘅幻想
十一年前踏足教育界，教過一個四歲小朋友，
佢一唔高興就會大喊大叫發脾氣，
佢媽咪話有一次小朋友係商場瞓咗係地下大喊，原因係買唔到佢想食嘅朱古力餅。
當年”少年，你太年輕了” 嘅我坐係consultation room聽住佢講小朋友嘅事，心裏就浮現出唔同心理學理論，然後就諗，如果我係媽咪嘅話，我就唔會咁處理，我會點點點點點.....
然後好多時係街見到小朋友情緒失控，好自然會睇吓家長嘅反應，然後... “哦，問題就係呢度，如果將來係媽咪，我一定唔會俾我嘅仔女咁啦!”
我以前真係太無知。
曾經，我係一個 “學院派” 媽咪，
每件事都守住規矩去做，
但我都係一個有脾氣有感受會有疲勞感覺嘅人，
有時會失手做咗啲 “錯” 嘅事，
例如對住阿女咆哮，
但冷靜過後，又會內疚到喊。
呢個 “好驚自己唔識教會害咗佢一世”嘅感覺令我每做一件事都步步為營，
結果做媽媽呢個身份變得好有壓力，同身邊嘅人爭執都多咗。
隨著時間過去，我發覺我學識將要求降低，
並唔係代表我選擇放養，
只係揾一個舒服啲嘅方法同小朋友相處。
我可以每日為小朋友準備豐富嘅時間表，
但我會無曬社交生活。
我可以每餐都安排有營養嘅食物，
但我會有個好混亂嘅廚房同屋企。
佢哋可以全天侯係合作寶寶，
但我會攰到不似人形。
早排睇過一個媽媽分享，佢有一句我好認同 :
“As a mother, you absolutely can have it all, you just can’t have it all at the same time.”
當上媽咪後，學識咗唔好做 “育兒專家”，
每個小朋友每個家庭都係獨特，
喺果一個moment應該用咩方法去湊去教，
只有父母先知用咩方法去渡過係最好。
最近芊芊上咗小一，
我同佢都適應緊，
大家都有崩潰失控嘅時刻，
我唔知道點樣先係最”好”嘅處理方法，
不過聽到佢講嘅呢一句，我就知道自己係無做錯:
“你真係一個好好嘅媽咪啊，我好鐘意你！”
