生命教育 - 與小孩討論人生的意義
「我好憎你生日！」
記得4歲左右嘅芊芊曾經講過呢句說話，
然後由此打開咗一場關於人生意義嘅對話。
芊: 我好憎8月，因為你生日，就會老一年，咁你咪好快老死？
我: 你驚我會死，然後見唔到我好傷心？
芊: 係啊，我好鐘意你，你死左見唔到你點算？
我: 媽咪仲好後生，距離老死仲有好遠，我應承你我會照顧好身體，擁有健康睇住你大學畢業結婚生bb，好無？
芊: 咁我聽日delete咗我相機d相，同你影多d，咁你死咗我都可以記住你後生個樣。
我: 好，其實天主賜俾我地生命，我哋應該好好咁運用，去做d有意義嘅嘢。
H: 咩係有意義啊？
我: 揾到你嘅夢想，做一個有影響力嘅人，改變吓身邊，社會，甚至世界嘅問題。
最近，因為呢一本「100天後會死的鱷魚」我哋再次討論呢個話題。
本書每頁都寫住 「距離死亡X天」，每睇完一篇四格漫畫，就離死亡近一日。
其實鱷魚每日嘅生活都好平淡，連芊芊都忍唔住話，
「吓，咁無聊就過咗一日，佢就快死㗎喎！」
到最後，故事輕描淡寫咁表達鱷魚先生遇上交通意外離開了。
成個故事，我最深感受係佢死咗之後果幾頁：
幾幅圖表達咗佢班好朋友如常咁生活，但會無意之間勾起對鱷魚先生嘅思念。
去到呢度，我同芊芊分享咗一句説話:
“One day you will be just a memory for some people. Do your best and be a good one.”
人生會遇上好多唔同嘅人，幼稚園，小學，中學，大學同學，爸爸媽媽，兄弟姊妹，老師，同事，朋友等等……
但唔係每段關係都可以直到永遠。
所以，如果可以喺相處嘅過程入面，俾到對方一個美好嘅回憶嘅話，其實都係一件幸福嘅事。
至於點留一個美好回憶，芊芊有以下睇法:
做個大方嘅人，原諒對方嘅小錯誤
表達愛意 (故事入面鱷魚先生唔敢同鱷魚小姐表白)
珍惜相處嘅時間
多啲講笑話
唔知道，你哋又會有咩方法呢？
