每個學生，都值得擁有一個機會。
最近有一班學生交project同present，
而份project係同自己嘅品格優點有關，
其中有一位同學嘅presentation 令我好感觸。
同學Q分享自己嚟自單親家庭，
並非喺愛之中成長，童年亦有好多黑暗嘅回憶，短短十幾年人生，好似經歷得太多事。
最難過嘅時間係近年先後被診斷有焦慮症、抑鬱症同邊緣型人格障礙。
Q提及過，喺其他人眼中佢係一個怪人，
無朋友，成績落後，精神同情緒都唔係處於一個理想狀態。
Q分享自己其中一個品格優點係「感恩」，
無論遇到幾唔如意嘅事，
都盡力喺逆境之中搵個目標俾自己，
同埋會好珍惜身邊所有嘅人同事。
完咗presentation之後….
Q: 老師，有咩意見俾我？
我: 喺我教你之前，學校俾咗一個好厚嘅信封我，我相信入面係關於你嘅情況。
Q: 啊，我知，成日都有㗎啦！
我: 不過，你知唔知道，其實我一直都無睇過。
Q: 吓？居然？！
我: 我覺得，我需要親身去認識每一個學生，由自己嘅感受去決定點樣教你哋會更加好，我唔希望俾其他意見影響到我對你哋每一個人嘅第一印象。
喺呢半年入面，我眼中嘅同學Q係活潑、主動、好有心想考到好成績，如果唔係佢自己分享，我都忘記咗佢係一個 “SEN” 學生。
可能係「自我應驗預言」效能吧，我眼中嘅佢好有動力，好有potential，然而亦都影響到佢不停努力、進步。
落堂之後，我諗起之前見過一句説話:
Never judge a child based on another teacher’s opinion. They deserve to be given a chance. They deserve a clean slate. It only takes a single adult to take a child around. This adult could be you.
人同人之間嘅互動實在太有趣，唔同嘅人會令小朋友顯露唔同嘅行為，自己第一身嘅感受同觀察先係最準確。
