卡通片當然好吸引小朋友，甚至大人都會鐘意。
不過漫長假期，每日都係迪士尼電影，都係卡通片嘅話，
真係眼睛腦袋都疲勞
我自己好鐘意睇戲，連帶兩個小朋友都好鐘意，
一到weekend屋企會變成週末影院！
我哋唔止睇卡通片，愛情親情傳記歷史宗教咩都睇。
我發現有啲人生道理，用電影輔助去解説會更易明。
例如，我用”小Q”去解釋生死，”阿甘正傳”解釋堅持唔放棄嘅精神，”奇蹟男孩” 解釋包容。
以下八套係我同芊芊一齊睇過討論過嘅電影，如果屋企有小學生，可以考慮吓一齊睇 (當然，有啲電影入面嘅情節未必適合小朋友自己收睇，需要家長指引):
星聲夢裏人 (Lala Land): Mia與Sebastian在這個夢幻城市洛杉磯相遇。Mia嚮往演藝事業，希望成為一位演員，而Sebastian想拯救垂死的爵士樂，卻懷才不遇。在這個星夢之城，兩人追逐著不可能達成的夢、互相鼓勵對方的事業，亦因為對方的出現，與夢想愈來愈近。
討論點: 追尋夢想。每個人都需要有夢想，而追夢係唔容易，甚至需要放棄一啲嘢，你覺得值得嘛？
劫後重生 (Cast Away): 講述一個聯邦快遞公司的員工在南太平洋上空遇難墜機，最後流浪到荒島。 他被拋擲到一個荒島生活，努力在荒島上生存。
討論點: 喺絶望中尋找堅持。人生一定會遇上逆境困難，好似戲入面嘅Tom Hanks，極端到流浪荒島，所有生活都要從頭學起，揾水源、開椰子，鑽木取火等，不斷失敗，不斷嘗試就係希望努力生存，有日可以返去最愛嘅人身邊。當生活唔如意嘅時候，咬緊牙關撐過，好似Tom Hanks咁努力適應，總有一日會出現轉機，充滿希望。
導盲犬小Q (Little Q): 將導盲犬的真實生活帶到觀眾面前，忠實記錄了一隻導盲犬從出生、訓練、服務到死亡的全過程，感人肺腑。
討論點: 生命教育，生離死別。我哋屋企有兩隻狗狗，兩位小朋友未出世已開始養，今年佢哋都10歲了，終有一日會暫時同我哋分別。呢套戲係一個好好嘅提醒，最愛嘅人同動物都會有離開我哋嘅一日，要好好珍惜相處每一刻。
登月第一人 (The First Man): 敍述美國太空總署於1961至69年間的籌備及完成登月任務的故事。 1960年代，尼爾岩士唐參與美國太空總署（NASA）的太陽神計劃，進行史上首個載人登陸月球的任務。
討論點: 認識第一個登陸月球嘅太空人岩士唐。佢為咗呢個任務，接受長達10年嘅培訓。成功背後嘅付出，值得去了解一下。
先分享四套電影吧，另外四套下集再寫。
