我教嘅實用心理學課程入面，
有一份功課係請學生做一個優點評估，
然後就自己嘅五個優點做一啲反思，揀五幅相去表達，再運用正向心理學嘅理論作解說。
班入面有一位同學，
佢分享到自己係一個好悲觀嘅人，
經常性出現「災難性思想」，未做已經覺得自己會失敗。
佢反思到同佢嘅成長經歷有關，
包括佢好渴望媽咪嘅讚賞，
但生於重男輕女嘅家庭中，佢永遠都得唔到讚美。
成績幾好都好，媽咪睇到嘅只係點解你唔夠細佬叻，
永遠只有唔公平嘅待遇同比較，
無論幾努力都好，
媽咪都唔會讚佢。
久而久之，就形成咗「習得性無助」，
對好多事情都採取「這些機會不是我的」嘅態度，
就算明明好想做到果個目標，
但永遠都提唔起勁去做，
覺得自己係一事無成。
甚至要好似今日咁企喺全班同學面前present，
佢都緊張到瞓唔著，
覺得自己會做得唔好俾人笑。
完咗到我俾comment嘅時候，
我只係俾咗啲鼓勵佢同話佢知我欣賞佢嘅地方，同多謝佢有留心聽書
放學嘅時候，收到呢位同學嘅Whatsapp，
多謝我嘅鼓勵，佢從來無試過咁正面地欣賞自己嘅優點。
我鐘意教育界工作嘅原因係，當我教緊學生嘅時候，其實同一時間，佢哋都教緊我。
多謝呢位同學再次提醒我讚美對成長中嘅孩子係幾咁重要，
同埋帶咗真正嘅快樂俾我。
正向心理學入面講到，
要獲得真正嘅快樂，
並非金錢或物質上嘅滿足，
而係利用自己嘅優點長處去幫助人。
每次我覺得我可以感染到學生，可以鼓勵到佢哋，可以令佢哋有成長，我都覺得好滿足，好快樂。
那怕我只係教佢哋一年，一個學期，一個星期，甚至只係一堂，
我都希望我講嘅説話，有一句半句可以改變到任何一個學生，幫佢哋揾到人生目標，而到大個咗，都仲會記得。
我自己鍾意採取「強項為本」嘅方法，希望幫每一個學生/小朋友揾到自己嘅優點，加以發揮。
但要認識自己嘅優點都唔係咁容易，如果大家有興趣，可以做吓呢份問卷，揾吓自己嘅強項:
https://www.authentichappiness.sas.upenn.edu/zh-hant
(揀問卷，VIA突顯優點調查，大概有二百幾題，做完之後有個幾詳細嘅分析，可以了解一下自己呢！)
