有兄弟姊妹都會明白，
大家鐘意互相投訴，互篤背脊。
而呢一星期停課留家日對夜對，
由朝早開始我就收到唔同投訴：
「媽咪，細佬好大聲嘈住我！」
「媽咪，細佬攞咗我舊擦膠又唔問我！」
「媽咪，家姐踢到我個玩具呀！」
「媽咪，家姐食多過我一塊曲奇餅啊！」
「哼，我好憎細佬，唔想見到你！」
「哼，我好嬲家姐，我唔鍾意你！」
無論幾嘈幾多投訴都好，我都盡量公平處理，唔會叫「大讓細」或者 「細讓大」。
不過，如果大家都明白對同一件事，每個人都有唔同感受同睇法嘅時候，呢個世界會更和平
話說，前幾日兩位困獸鬥，朝早家姐嫌細佬zoom上堂太嘈，然後一齊畫畫又話佢唔聽指示，再而爭拗企鵝住喺邊度…
旁觀者嘅我只係聽到好多「媽咪啊，媽咪啊！」連去廁所嘅30秒都唔放過我。
我忽然諗起之前喺FB見好多人玩嘅一個遊戲，就係喺對方嘅背脊上畫畫，然後對方再畫返出嚟，而好笑嘅地方係，兩幅圖畫可以好大分別。
我諗，不如用呢個遊戲去表達，同一件事(同一幅圖畫)大家嘅感受同意見都唔同，其實無對錯呢？
於是我就邀請佢哋一齊玩呢個遊戲。
其實，喺玩嘅途中，兩個已經相處融洽，完全唔記得咗「你踩到我，我好嬲你」呢啲説話
有時候，用幽默去處理sibling conflicts也不錯。
