最近，除咗疫情外，電視同social media 討論得最多嘅應該係烏克蘭打仗。
究竟點同小朋友解釋新聞上面嘅畫面呢？
「媽咪，點解會打仗？」
「打仗唔係以前先會有㗎咩，點解而家又嚟？」
「啲人係咪死咗啦？」
家姐喺新聞見到，同學之間有討論，上網又見到，我都諗咗幾日點樣將打仗呢件事，用淺易易明嘅説話去解釋。
對於點解會打仗，點樣打仗呢啲技術性/歷史性問題，我處理唔晒
不過，我覺得呢個係一個幾好嘅機會講 「解決衝突」「成見」「權力」。
我回想起，家姐有段時間同我講: 「有幾個同學成日改我花名，叫我Hairy又笑我，我好唔鍾意！」
我: 「啊，咁你一定好唔開心呀。」
姐: 「我好嬲啊，所以唔睬佢哋！」
我: 「不過呢，我覺得我哋需要講出自己嘅感受，其實佢哋可能未必出於惡意，只係唔知道咁樣會令你唔開心呢！」
姐：「我有講！我有鬧返佢哋，不過佢哋都繼續笑！」
我：「下次呢，你試吓好冷靜咁同佢哋講，你聽到呢個花名唔開心，我都係鐘意自己個名，你哋可以叫返我個名，又或者。。。。叫我Harry Potter囉」
姐: 「哈哈，都好！」
過咗幾日，家姐話無人再改佢花名，佢哋亦做返好朋友一齊玩，家姐話當佢講Harry Potter嘅時候，大家都笑出聲，成功用幽默化解咗。
其實，我最希望係小朋友習慣為自己發聲，be assertive，如果成日都怕事唔出聲，其他人就會覺得你都無咩啫，就會繼續蝦你。
我諗學習be assertive嘅方法，就係不停練習，由小事開始做起。
然後講返去打仗…
我: 「打仗嘅目的，都係兩個地方嘅人大家有唔同睇法，然後決定用暴力解決。」
家姐:「有槍，有坦克車，好多人死咗囉？」
我: 「係吖，所以當你哋長大成為有權力、有影響力嘅人嘅時候，一個決定就可以影響到好多好多人，媽咪希望你哋學識做一個有愛嘅人，遇到同你有唔同意見嘅人，自己要勇於表達之外，亦都需要聽吓人哋嘅意見，暴力並非一個好方法…」
而細佬，佢對打仗嘅認識，就係停留喺呢套玩具上
