“媽咪，你呢排好似唔係好開心，你話我知，你係傷心，憤怒，害羞定係害怕呢？”
最近心情唔好，我以為係兩個小朋友面前掩飾得好好，盡可能保持笑容陪玩陪食陪瞓，點知都係俾大小姐發現咗。
然而，我低估咗我負面情緒對佢嘅影響力 - 佢有透露見到媽咪唔開心，佢都好難過。而佢近日嘅行為都俾我感受到，我哋嘅情緒係互相牽動得好緊要。
我一直都好鐘意小朋友，事事願意親力親為去陪伴去教去照顧，我成日都話，教佢哋係用盡我一世嘅愛心同耐性，而可以睇住佢哋成長，絶對係開心同好有滿足感。
不過，我相信所有媽媽都明白，教育小朋友絶對會有挑戰自己底線同磨蝕耐性嘅時候，加上全職媽媽24小時無停工運作，或者在職媽媽收工趕返屋企將晚餐倒入口然後跟功課陪玩陪瞓，加上呢排work from home困獸鬥式係屋企日夜對住，同一本書讀10次，同一副玩具玩20次，同一句說話講30次，幾愛小朋友都會覺得辛苦勞累。
然後，我曾經以為自己可以將呢啲辛苦收埋，但原來我連一個五歲嘅小朋友都呃唔到。
我成日都話，最緊要係兩個寶貝開心，想盡辦法令佢哋有快樂嘅童年，但我忘記咗最重要嘅一點係 (我相信好多爸媽都會遺忘咗)，
因為我哋成日將個焦點擺咗去小朋友度，好易忘記咗照顧自己嘅情緒，而我好相信每個小朋友都希望擁有快樂嘅爸媽，有快樂正面嘅爸媽，先會有開心嘅小朋友。
究竟，做啲咩我會快樂呢？
呢個問題我諗咗幾日，我發覺所有嘅答案都係同小朋友有關。
我需要一個空間去思考一下，而我發覺練習mindfulness係有幫助。大家可以了解下然後試試。
你哋呢？仲記唔記得做啲咩係會快樂㗎呢？
